Denne vår sæle sommarljose natt
No skrur eg tidshjolet 60 år tilbake i tid.
Klokka er elleve på kvelden. Vi har pakka ferieklær i Kadetten; godt med ull- og litt sommarklær i fall temperaturen stig. Vi er litt nord for midten av Norge, i Brøstadbotn i Midt-Troms.
Vi har nett feira Jonsok. Ein søring som eg er vand med høgt og stort bål og flotte flammar til vers. Her er det store å få mest mogeleg med røyk. Det synest best i dagslys. Dette underlege og vidunderlege landet vårt. Kor mangearta og mangefarga!
No står vi klare for den store ferieturen. Eg skal besøkje stader med namn eg berre har lese på kartet. Vi skal innom alle dei fem fjordane i Finnmark. Vi hadde ei hugseregle på skulen: VA-TA-LA-PO-AL.. med trykk på LA. Det er som ei stofe i ein sang. Varangerfjord, Tanafjorden, Laksefjord, Porsangerfjord og Altafjord. Orda, skjønt kraftfulle og fargerike, blir bleike i forhold til det verkelege landet. Skinet på fjordflata, alle buktningar og nes og øyer, busetnader… Fjell stig opp, lyng og fjellbjørkeskog kravlar seg oppetter. Menneska blir små i dette veldige rommet. Spreidd langs strendene og bak nesa, bur folk. Ikkje i bygder og grender, slik dei har det for vane i sør. Her bur folka i fiskevær. Og dette folket snakkar som ein sang. Både rytme og melodi gjennomsyrer stemmene i folket. Mine barn blei då også melodiske menneske, både med slåttestev og klangen frå Nordlands trompet…
Største opplevinga er Finnmarksvidda i midnattsol. Vidde på vidde, og vidder bakom der igjen. Som vi nærmar oss Kautokeino, glir sola lenger og lenger ned mot synsranda, der himmelen møter viddene, og sola stoggar eit øyeblikk, tenkjer seg om før ho tar sats og stig i glideflukt opp mot den nye dagen.
Det er lang dags ferd mot dag, Lyset omsluttar oss, det er sommarvarme og gylne vidder. Karasjok er ikkje kald og i Kautokeino bur folk i Guovdageainnu. Så feil kan skulebøkene ta..
Sommarnatta er enno varm og mange timar seinare køyrer vi ned til Varangerbotn. Her møter vi det kalde gufset frå Nordishavet og kvikksølvet trekkjer seg sammen 20 grader. Vi er i Landet av kontrastar…
